《撲克王》

今日筆者終於去睇o左《撲克王》(Poker King)喇，睇完之後o既結果係帶住一大堆問號離場，因為部戲實在有太多問題喇！
故事方面，講述身為某博彩集團太子爺o既古天樂o係佢老竇死o左之後被獨攬大權o既劉青雲以德國話事啤唻決勝負，結果慘敗被迫走，於是就由頭開始學習撲克 牌，決定有朝一日再次向劉青雲挑戰。本片好明顯係走小子成長o既路線，但係睇到最後筆者反而唔多想古天樂勝出，因為佢o係最後o個場決賽演譯得實在太乞人 憎，完全都冇作為主角應有o既「大將之風」。其實本片o既第一場開始就經已出現問題，劉青雲同何超儀兩個人講對白o既timing非常古怪，聽落好似等緊 對方講完之後，自己再接住講第二句，似唸台詞多d，拍得相當差！另外，成部戲充滿住令人費解o既冇用場口，例如張兆輝都唔知出唻做乜?!陳又南同Kama o個條副線又係可有可無，最慘亦唔係好睇呀！重有o既就係結局o既計中計，完全係一個反高潮o既搞法，為扭橋而扭橋，個人覺得唔合理兼搵唻搞，真係激死！ 全套戲筆者唯一覺得最好o既就係旋轉木馬o個個設計，其他o既都只能叫做好一般，甚至係水準之下o忝！不過，唔知係咪筆者開始同社會脫節喇，同場o既其他 觀眾，尤其是後生o個班，佢o地o既反應都好似睇得幾開心咁，重不時有笑聲o忝！可能有問題o既係筆者自己都未定呀！
總而言之，個人認為本片係就係問題多多o架啦，不過相當普羅大眾未必會覺得係問題唻o既，至於鍾唔鍾意就要閣下自己入場睇過先至知呀！

評分：☆☆
(五☆為滿分)